هل الكورونا ليها مميزات؟

هل الكورونا ليها مميزات؟؟

- طب هل الكورونا لو استمرت معانا فتره طويله كده مش هيبقى فيه تعليم ولا مدارس ولا كليات ولا كورسات ؟؟

- طب انت تعرف ان Mark Zuckerberg مؤسس الفيس بوك او bill gates مؤسس مايكروسوفت مكملوش تعليمهم فى الكليه وطلعوا منها مع العلم ان مكانش فيه كورونا على وقتهم ولا حاجه وابتدوا يطوروا نفسهم فى المجالات اللى بيحبوها ويتعلموا واستمروا فى عمليه البحث والتطوير والتعليم الذاتى لحد لما ابتدوا فى مشروعهم وبقوا من اهم وانجح واغنى الشخصيات على مستوى العالم ... طيب يعنى انت عاوزنا نسيب تعليمنا وكلياتنا ولا نعمل ايه لا استنى بس متسيبش كليتك ولا حاجه.......

كل اللى عليك انك بس تبدا ويكون عندك استعداد انك تحط رجلك على اول خطوة على سلم العلم والبحث عن تطوير نفسك فى المجال اللى انت بتحبه وعاوز تتعلمه.....

طب بص يا سيدى فى حكمة بتقول "ان السعى للتعلم هدية والقدرة على التعلم مهارة ولكن الاستعداد للتعلم هو خيارك وهو خطوتك الاولى نحو النجاج والتقدم"

بنشوف ناس كتير بيبحثوا عن اى طريقه لاكتساب المعرفة واكتساب المعلومة وتطويرها هو ده ببساطه اللى بنسميه (التعلم الذاتي) self learning وهو ده اللى هنتكلم عليه النهاردة....

--- طيب يا سيدى ايه هو مميزات التعليم الذاتي ده؟

- طبعا ليه مميزات كتير جدا ودى اهمهم.

1- انك سهل تتعلم اى مجال او اى مهارة انت بتحبها.

2- تكلفة اقل من التعليم التقليدى (الاكاديمى).

3- التعليم الاكاديمى انت ملزم بمنهج وضعه شخص واحد علشان تقدر تجاوب على الامتحان وتنجح عكس التعليم الذاتي عندك وفرة من المراجع ومن وجهات النظر ومن اماكن التعلم وتقدر يتشرحلك المعلومة من اكتر من شخص.

4- انك تقدر تتعلم فى اى وقت واى مكان وانك غير ملزم بوقت معين ولا بمكان معين للتعليم.

5- واهم ميزه ان محدش واقف فوق راسك علشان تتعلم لكن التعليم الذاتي هو ناتج من رغبة داخلية جواك انت انك عاوز تتعلم مهارة جديدة.

--- طب تمام اوى كده ابتدى ازاى وايه الادوات اللى محتاجها علشان ابتدى؟

- بص يا سيدى كل اللى انت محتاجه جهاز كمبيوتر وانترنت وقلم ونوت بوك علشان تسجل المعلومات المهمة وتكون مرجع ليك... بس كده يا سيدى شفت الموضوع سهل ازاى...

--- طب تمام بس ايه بقى المواقع اللى اتعلم منها؟؟

- فيه مواقع كتير اشهرهم edraak.org و rwaq.org ودول باللغة العربية وفيهم كورسات فى كل المجالات وفيهم كورسات كتير جدا مجانا. ... باللغة الانجليزيه فيه كتير جدا اشهرهم udemy.com و coursera.org و lynda.com وكل المواقع اللى انا كتبتها دى سواء بالعربى او باللغه الانجليزيه بعد ما تخلص الكورس بتاخد شهاده معتمده منه بالماده او بالمجال اللى انت خلصته.

وطبعا فى كنز اسمه ال youtube.com فى كورسات كتير مجانا فى كل المجالات بعيد عن المحتوى الترفيهى اللى مجتمعنا مهتم بيه...

بس كده يا سيدى شفت بقى الموضوع سهل ازاى ...

- باختصار الكورونا علمتنا ازاى نشتغل من البيت وهتعلمنا كمان اننا نتعلم من البيت ان شاء الله لو قاعد فى جزيره لوحدك انت بس محتاج كمبيوتر وانترنت.

- مستنى ايه بقى علشان تبدأ استغل وقت الحظر وان معظمنا قاعد فى البيت واستغل الفرصه واستثمر وقتك وقوم دلوقتى ابدأ..

لو عاوز تعرف اكتر معلومات اكتر عن (التعلم الذاتي) self learning وايه المجالات اللى ممكن تتعلمها تابعنا على الفيس بوك واعملنا لايك واستنى مننا كل جديد.